كحل الريحان

موضوع: كحل الريحان 2010-01-11, 18:10

لا تحجي عله حسنك خاف احسدك يوم
وانه البيك راسم كل صور قصتك
ياموسه بزمانك ترهب العشاك
وطيور السعاده موجره يم عصتك
يالتارك علينه السهر والحسرات
وانته من الورد مندر صبح حصتك
يلمصنع عسل شفتك تروي الناس
وشفاف العسل تتحسر بمصتك

لا ارعن تكول الكلب شرعا
سيوف العشك عالعشاك شرعا
لون مص الشفاف يجوز شرعا
لاخذ شفتك الحلوه اليه

يلطولك لغز ماينحزر لليوم
مانعرف قيامه بوكتي فارضهه
لو شجرة ورد ومكحله بريحان
من لطفه الجليل علينه عارضهه
لو مصنع جمال الكلهن الحلوات
والحلوات كلهن حسن قارضهه
ياحسجة دواوين العشك والناس
والجلمه الجميله علينه فارضهه
امس جانه الحزن رايد يرض الروح
ومن شافك ويانه استثنه مارضهه

الي تك جوز من شفتي والك جوز
وبعد ماكول من حبنه ولك جوز
عسل شنهي طعم شفتك ولك جوز
ابشرك تاهت شفافك علية

موضوع: رد: كحل الريحان 2011-03-08, 03:06

صح لسانك

تقبل مروري البسيط

» جريدة المنارة تنشر كحل الريحان