خارطة العراق

صن خنجر حجيكم واعرف شتسمع
روح عله القوافي واترك المطلع
ماترهم قصيده بوصف ابو الثورات
كل ديوان بسمك يعتبر مقطع
عله زنود السماوه نطبع صوت الثار
وبفي جامعتهه العلم يتربع
تاريخ الكرامه نطبع بالاقسام
والاخلاق صارلهه القسم مصنع
ما اعقلهه يوم تضيك بيك الكاع
معقوله السماوه من النخل تجزع
ما تنساك ابد ماترهم بلياك
هم سامع العيد بلا بشر يطلع
ما تجزع شلون يصير تجزع يوم
اذا جزعت الكوت لنخوتك تفزع
بس تسمع صدى الحيهم تجيك زحوف
عله خدود النذالة جفوفهم تطبع
اهل نخوه الرميثه وحطهم بيمناك
رفعت راس اهلنه بطيبهم تشبع
لا تترك جرح يتخطه حد محدود
بس تنخه العماره من الجذر تشلع
صدى صوت الاهزوجه يسمع الصوبين
وتشل الجرح وبسدة تتربع
اذا تنخاهه ذال تروج بيه الكاع
اذا ذي قار اصيحن هم يظل مهجع
بطحه وناصريه فهود والغراف
شطره ويه الرفاعي وسوك الملمع
هذن كلهن ذهب وتصفن من الخوف
ثبتن بالمعالي بدر المرصع
وحق در النجف والحيره والنعمان
وحك البلقصايد حصته المطلع
وحق صوت ام رضيع بلا رضيع تنام
باكو من اديهه البلمهد يرضع
ثق ما يبقه حاقد بالعراق يحوم
معقوله الفقار من الركب يصدع
وطبع بينه اليعوف الوطن هم يعود
نتوضه بحضرته ونسجد ونركع
جرح واحد طبعنه من الجبل للهور
ومفتاح الضماد بجف هله مودع
وما تشفع العبوه العله الناس تثور
بس طيبة كلبكم بالشدد تشفع